Acts 9

Sol nomane ake toi

(Aposel 22.4-16 ne, 26.9-18)

1Embe yei ba Sol ge, une Jisas pillgi dji una moi al, na ye tano we dje molo, to goyo dje pille yei, opa gale awi iwa kerman ta moi al une po embe dji, 2ni na pepa bolo aumbenka, na ipo Juda una lotune numb dumo Damaskus paknato awo puno. Alla, na po kanno, iwa mo ana ta Jisas kondwe yero mal pillgi djine ge na to kaye to, i er Jerusalem puno we dji. Iwa kerman moi ge kapla we dje pepa bolo Sol awi. 3Sol pepa ge i Damaskus puno dje po, manda pika, kupill al ge ola dje talang kerman ke ye Sol moi al wo poll dji. 4Djika, Sol yage kal toika, una ta numbke ge embe dji, Sol, Sol, ni na namba yei pille ye ke ye aunden ne? dji. 5Sol kandja embe dji, Iwa Kerman, ni una ne? ne dji. Na iwa Jisas moro. Ni na ye ke ye aunden. 6Ni aglo er Damaskus pakna ben. Ni kogo yemben mal ge iwa ta wo ni dje aunda we dji.

7Kandja embe dje kerika, Sol aike pi una ge kand golo kiye dje aglo moi. Iwa ta Sol boll kandja dje mopill iwa ge ga nakani ba kandja dji mal ge pi. 8Molmaka Sol yene nale pine dje kanno dje yei ba man pai, nale emill yei. Une embe moika una wo une agle amblo i er po Damaskus pakna pi. 9Sol Damaskus moi ge nale emill yeika, nu ne kwa mokna nano molo pika ege sokara er wo pi.

10Damaskus paknato Jisas kogoye iwa ta moi. Une kandjiye ge Ananaias we dji. Une nale al wal ta yeika Iwa Kerman embe dji, Ananaias! we dji. Ananaias Owo, na moro we dji. 11Iwa Kerman embe dji, ni aglo molo kondwe ta kandjiye Kondwe du dje yero we dji al ge, ni er Judas numbye al piye! Dumo Tarsus iwa ta kandjiye Sol we dji ge une kamang ye moro, ni po une ge we djimben. 12Na oukumb ta ombine dje Sol awill, iwa ta kandjiye Ananaias we dji ge wo une abiyaka, yene nale au djindaka kanda we dji. 13Iwa Kerman kandja embe dji ba, Ananaias embe dji, Iwa Kerman, iwa moro ge Jerusalem po ni pillgi pai una ye ke ye awi mal ge, una kandja merke dji na pill. 14Opa gale awi una kerman kambono pepa bolo une ge aumaka une ipo ni kandjin al pillgi djinj una mor al ge kaye worno dje woi we dji. 15Dji ba, Iwa Kerman embe dji, ni er piye! Iwa ge na dje ill iwa moro. Epil djell una ga unakne kerman boll mor ge une po na kandjina dje awo, Juda una dje awo embe yenda. 16Une na kandjina dje orko woro wanda ge une imb kerman kakda mal, na une ombine dje auno we dji.

17Tau agelo kandja embe djika, Ananaias er Judas numbye al po agle soka woro Sol moi al amblo embe dji, agana Sol, Iwa Kerman Jisas ni kondwe kanin iwa ge, une na dje wori, na wo ni nalen al alla au djinda dje, God Murble wo ni boll moya dje pille wondo we dji. 18Kandja embe djika iwa Sol ge yene nale al ge wal kindine mal moi ge ola dje para dje yagi. Une nale al au djika, une agika una wo ipo nu pagle awi. 19Une kwa ta noika, yembe alla wo pai.

Sol Jisas kandjiye dje pene wordo

Paika Jisas kogoye una Damaskus moi una ge Sol po ege pende kambono boll aike moi. 20Lotu numb yei al ge Sol ola dje po Jisas moro ge God warye moro we dje una awi. 21Una pi una moi ge, ga porapora aya dje molo embe dji, iwa moro ge une asa Jerusalem molo Jisas pillgi dji una ye ke ye awi ge mo? Alla, una dji pupin, une ba woi ge, une po una kaye to, opa gale awinj una kerman ipo kot ye aunda dje pille woi we dji. 22Dji ba, Sol yembe dongall wo er kerman pika, Juda una Damaskus moi al ge une po embe dji, God dje worda iwa Krais ta wonda we dji ge, Jisas wale woi we dji. Sol kandja dongall embe dje awika, Juda una pille aya dje molo, kandja dje yem worne kune nayei.

Juda una Sol to gopon dje yei

23Ege merke wo er pika Juda una Sol to gopon dje kandja begi ba, 24una po djimaka, Sol pi. Une pille moika, Juda una imina armina Damaskus gull kerman djillake porapora pai al ge, Sol to gopon dje pille kui ye moi. 25Emill paika Sol kogoye una po Sol i djengill kon kerman ta yei al paknato wori. Gull kerman pla pai al kon ge kaye kolo orko wormaka kiye dje er kal pi.

Iwa Sol po Jerusalem moi

26Sol er Jerusalem po Jisas kogoye una boll aike moyo dje yei ba, kambono kand golo, une Jisas kogoye una namoro dje kani. 27Embe dje kani ba Barnabas wo Sol dje ipo aposel kambono moi al pi. Sol Damaskus puno dje molo Iwa Kerman ge kani mal ne, Iwa Kerman kandja dje une awi mal ge Barnabas kandjambe toi. Alla Sol Damaskus po Jisas kandjiye al kand nagolo, kandja dje pene woro awi mal, Barnabas ge para kandjambe to awi. 28Barnabas kandja embe dje awika, Sol po aposel kambono boll aike Jerusalem molo, kand nagolo, Jisas kandjiye ge dje una awo moi. 29Juda una kandja Grik dje moi una ge Sol po Jisas kandjiye dje awika, kambono boll nonga dje molo Sol to gopon dje yei. 30Embe yemaka pillgi dji una Sol dje ipo Sisaria po dje wormaka er dumo Tarsus pi.

31Dje wormaka, pillgi dji una dumo Judia, Galili ne, Samaria moi ge kiwa moi, una ye ke ye nawi. God Murble moro ge ye worika ga ellne tukne gi djika, wopake moi. Ga Iwa Kerman boll molo kand golmaka, una er pakna po molmaka merke moi.

Pita po iwa Ainias i gun woro awi

32Pita dumo merke wane molo, pillgi dji una kona dumo Linda moi ge une kanno dje pi. 33Po kani, iwa Ainias we dji ta moi. Une kake agle goi, kognumb 8-pela wo er pika une bo al pa molo molo yei. 34Embe moika Pita po embe dji, Ainias, Jisas Krais ni i gun woro aundo. Ni aglo mole! Ni ou pan wal yero ge, i amblo pakna wore! Djika Ainias ola dje agi.

35Kiwa moika, dumo Linda una ne, dumo Saron una porapora kane, nomane ake to, Iwa Kerman Jisas boll pillgi dji.

Ana Dorkas goi ge Pita wo i gun wori

36Dumo Jopa yei al ge Jisas kogoye ana ta moi. Yene kandjiye ge Tabita we dji. (Una Grik kandjine pai ge Dorkas we djinj.) Ana moi ge ege ege una moi al po kandja wopake dje awo, una wal kane nanoi una moi al une po ye wopake eri ye moi. 37Embe ye moika, kune ge, ke ta toika une molo goi. Une golo pai ge una po nu woro, rum plato yei al ge ipo pagi. 38Dumo Linda ne, dumo Jopa ge soka manda manda yepill ge una embe dji, Pita woi, une dumo Linda moro we dji. Jisas pillgi dji una kandja sigye dje wormaka iwa soka po, Pita moi al embe djipill, ni ola dje we! djipill. 39Djipillka Pita iwa soka boll aike er yem pi. Kambono po pillau djimaka, una wo Pita dje i er rum plato ipi. Ana kangill porapora kimb ye molo, Pita i pakna woro, ana Dorkas gun moi poke une kon konom kayekaye to bolo una awi mal ge ana kambono i ombine dje Pita awi. 40Aumaka Pita ana porapora dje orko woro, yene kake gopye boglo kamang yei. Kane ake to ana golo pai ge kane embe dji, Tabita, ni agle! dji. Ana ge nale pine dje Pita kane aglo ami dji. 41Pita wo ana ge agle amblo i pla woro djika, pillgi dji una ne, ana kangill porapora womaka, ana gun moi mal ge Pita ombine dje yem woro awi. 42Pita wo embe yei ge una djimaka dumo Jopa una porapora pillmaka, una merke pille Iwa Kerman Jisas boll pillgi dji. 43Pita dumo Jopa Saimon numbye al pa moika ege merke wo pi. Une Saimon ge kog kau gakle kogo ye ye yei una moi.